喺置地廣場散步，睇到不少靚牌子靚貨，但唔係我地呢啲人捨得買嘅，不過望吓櫥窗，想像購物之爽，都係賞心樂事，手錶廣告有云：「不在乎天長地久，只在乎曾經擁有」，左丁山連擁有也不在乎，有得望吓已經滿足。香港闊太，內地富婆等有錢人隨街都係，啲名店其實唔想左丁山呢類人行入去阻住晒。
行行吓行到太子大廈，見到李純恩正在等候朋友，佢立即叫左丁山去睇佢嘅攝影展覽。李純恩係攝影發燒友，平時在香港唔寫稿之時，就鍾意周圍去影相，呢日出街揸住嘅唔係相機，而係 iPad，有乜作用呀？李純恩話：「你要學嘞，我依家寫稿用 iPad，下載咗一個軟件，叫做 FastFinga，係手寫板，用手指寫好，立即 E俾報館，方便妥當。」咦，上星期在馬場沙圈見到張志剛，佢揸住個 iPad II，佢話用以睇投注賠率，無以尚之，寫稿又掂，但佢簡單到用手指寫落 Notes，然後 e-mail，報館大概唔駛再打字，更方便。唔怕食指指頭痛嘅咩？李純恩與張志剛都話唔會，睇嚟左丁山或者要學習吓。
講番攝影，李純恩話佢出版咗一本攝影集，名叫《生命色彩》，為不少朋友造像，包括高錕夫婦、金庸、黃永玉、楊凡、張敏儀、倪匡、林憶蓮、潘迪華等等，加上不少風景人物圖片，遍及大江南北以及倫敦街頭、吳哥窟、澳洲國家公園、京都街頭，四處捕捉人物剪影，呢本影集由 Nikon資助，出版主要目的係為高錕慈善基金籌款。高錕基金由高校長之校友及友好組織而成，成立目的係為腦退化病患者及家屬提供協助。據一啲資料， 65歲以上長者，一成人患腦退化症、 80歲以上患病機率係兩成，頗為嚴重，除患者受影響之外，照顧患者之家人有時會搞到心理生理都十分疲累。高錕校長大概係香港知名度最高嘅一位腦退化長者，大家都願意為佢奔走效勞，籌集善款以幫助其他腦退化病人。李純恩知道之後，將佢歷年拍攝嘅人物圖片挑選結集成書，由 12月 20日至 25日在海港城海運大廈展覽大堂展出，賣書款項悉數捐予高錕慈善基金。
23/dec/2011
《蘋果副刊》
左丁山
No comments:
Post a Comment