中門大開：鐵拳金剛

最近官場中人吹開水，都會講林 D9上位林鄭月娥黯然一事。政務官同傳媒反應好唔同， AO中人撐 D9大致分一半一半，但傳媒人就一面倒為林鄭抱不平。林鄭政治形象之佳，屬官場之最，佢硬淨打得不畏權貴深入民心。

香港政治生態好奇怪，但凡上位女高官，必定係硬邦邦低 EQ之人，林鄭或以前葉劉、羅范都係一個款。相反今日商界上位女強人，則多屬高 EQ政治能力強但有少少師奶 Feel之人，形象好似掉轉晒。

化身捍 衞核心價值清流

其實在殖民地時代，上位女高官並非林鄭一款，外邊睇一樣係有媽打 Feel，好似李麗娟，或名媛名太 Feel，好似陳太、前新聞處處長邱李賜恩、廣播處處長張敏儀，八面玲瓏，招呼周到，談笑用兵。男高官則係以肥龍許仕仁、葉澍堃、楊啟彥、孫公呢款為主，世俗化之餘亦有人味，擅於搞關係及統戰工作，唔似今日所謂好打得局長似鐵拳金剛機械人。
據 AO透露，今日官場主流漸變了林鄭一款，大家以佢做 Role Model，總之開跨部門會議就得罪人多稱呼人少，當正港大辯論隊咁玩，但來來去去都係幾款論據，大部份時間係為拗而拗。未行問責制前， AO要做政治工作，尤其係肥彭年代踢班友仔出去面對議會、公眾及傳媒，高官被迫放下身段同班反斗議員、街佬左佬玩政治，許仕仁也由此冠以風月版雞蟲「瘦虎肥龍」之稱號，但他不以為意仲以此「花朵」行走江湖。問責制之後政務官變成執行角色，毋須考慮政策推行政治層面，好似政黨、民情、輿論反應，眼界窄之餘也樂得擺出一副不妥協姿態。尤其當認為問責官員太多政治考慮時， AO化身為捍 衞香港核心價值的清流，凡事企硬，吹咩！而公眾對親疏有別，政治酬庸及無能者居之十分反感，反而推崇這類企硬者為香港良心。
這種海瑞情意結，正在中青文官系統蔓延，特區政治會變得越來越不可為，人人追求政治道德上的勝利，又點會理實際做唔做到嘢呢？

添馬男

《蘋果財經地產》

6/oct/2011